مقال في سب الذات النكدية

توقف الزمن للحظة… أمسك بقميصي المفضل وأشم الرائحة العفنة التي تراكمت فيه وصدمة الفكرة توقد ذهني!! هو أنت ؟!

جوه روحه انحبس… الكائن المسكين المعذب

هو… اللي رغم طيبة قلبه وحسن نيته, مستقصداه الدنيا بالنكد

بتطارد أفكاره الفرحانه وبتحبس أمنياته العشمانة

ماشية وراه تشطبله على احلام مشروعة, والسؤال اشمعنا هو

الانسان البرئ

الانسان …. اللي عاش طول عمره ..فاكر انه برئ

ولسه ما حدش قاله …انه هو الجاني

اللي محفظش في يوم نكتة ولا فزورة لطيفة

اللي مبيعرفش يركب عجل ويلعب كوتشينه

اللي مبيحبش السفر وقعدات العيلة الكبيرة

أوحش واحد بيرقص في الفرح

أبو صوت سخيف في الغناء

وأبو ضحكة وحشة في الصور

أنت !! ايوه بكلمك أنت !!  خد الكلمتين دول في عضمك !!

انت ضحتك بتطلع وحشة في الصور عشان مجربتش تضحك كثير..
شفتهم بيضحكوا فقارنت نفسك بيهم, لحسن تكون ضحكتك اوحش من ضحكتهم
عشان خفت تضحك فبقيت بتتكسف تضحك,
وبدأت تحس ان الضحكة عيبة او تفاهه قلة قيمة ,بس عشان تدافع عن نفسك,
وبدل ما كنت مبتضحكش خوف بقيت مبتضحكش عقيدة واقتناع,
ولسه فيه حاجة جواك بتخليك تدور في الصور اللي بتتاخد ليك –غصبا عنك-  وتشوف يمكن الضحكة طلعت مره حلوة,
لكن عينك بقت تلقط الضحكات الرخمة وتنسى الضحكة الجميلة وعقلك يقلك مفيش فائدة متحولش تاني, انت ضحكتك وحشة

انت صوتك وحش, عشان انت بتتكلم قليل, عشان صوتك مسمعتهوش كثير,
عشان بتقعد ساكت بين الناس, تخيل انت قعدت ساكت قد ايه وبتسمع لاصوات الناس قد ايه,
لحد ما بقتش تعرف تطلع صوت زيهم
مجربتش تغني في فصل او رحلة, خفت وقارنت نفسك بيهم,
لحد ما جه يوم لقيت نفسك مضطر, فطلع صوتك وحش (في نظرك أنت) اتكسفت أكثر وقررت تبطل تغني,
وبقى الغناء بتاع ناس تانيه , مش انت, ناس….. اه …هايفه لكن انت, جاد ومجتهد ,
وحتى لو ضحكت على روحك وقلت مش مشكلة اقعد معاهم, انا بعرف اتعايش !! ,
لكن جواك حاجة بتقول , انت مش زيهم , او يمكن هم مش زيك, انت احسن ..انت أعلى ! .. هم اقل ,
اهتمامتهم ودماغتهم أقل ! … بيستغلوا دماغتهم في حاجات مش مفيدة, زي الكلام والرغي (التواصل الاجتماعي) على الفاضي والمليان, اما انا فبسمع وبستفيد وبشارك بالمفيد , او مشاركش خالص, وبكده اكون انا الأقل غلطا !

الحقيقة يا بيه

انهم مش هايفين ولا حاجة , الناس ديه كلها مهمة زي سعادتك بالظبط , وأعذرني لو قلتلك أهم منك, وبيحققوا نجاحات أكثر في حياتهم الجادة, الناس ديه بس بتعرف تستمع بحياتها وتنبسط, الناس ديه مبتخفش تجرب روحها في حاجات جديدة, ومبتحولش تقارن نفسها بغيرها, لا تنشغل بالحكم على التجارب صح ولا غلط قد ما بتحاول تستمتع بيها وتعيشها

الناس ديه بكره هتبقى احسن, لانهم بيعرفوا يدوا لكل حاجة حقها, ساعة ما الناس بتضحك بيهزروا ويضحكوا ,بصوت عالي !, وساعة ما الغناء بيطلب بيغنوا ويرقصوا ويجروا ويتجننوا !!! بيعيشوا اللحظة بلحظتها,

هم دول الناس اللي وقت الجد والشغل بيعرفوا يركزوا وينتجوا , مش زيك مشغول بنفسك المتألمه من اخفاقها في التعايش مع الناس ومازالت في صراعها مع الفطرة لاجبارها على اتخاذ مسار نفسي غير طبيعي … مسار الانسان الجاد الملتزم المهذب …اللي عارف هو بيعمل ايه كويس … الانسان البائس اللي انت عارفه كويس في مرايتك

باب الخروج

في اعادة دورة تاريخك مرة تانيه , ابني نفسيتك من جديد, رجع الشريط من الأول خالص

أقسم على عقلك يبطل مقارنة واحكام, وأحلف على روحك بالطلاق لو مبتطلش تستلذ بالنكد والشجن

أمسح أغانيك وأفلامك التراجيدية ونفض لصحابك النكدين

روح أقعد مع الأوغاد المبسوطين اللي مش بيليقوا عليك ولا عمر ما عجبتك صحبتهم

أضحك في قعدة الضحك, وابتسم في كل صورة, ممكن هتضطر تقلد الناس “الطبيعين” دول في الأول لحد ما هتعرف سكة التصرف التلقائي لوحدك, أتمرن على “التعايش” مع الحياة لوحدك قبل ما تجرب مع الناس, غني في الدش! , و أنبسط من صورتك اللي في المرايه, ارقصي في اوضتك على اي مزيكا هبلة, واحكي لنفسك بصوت عالي القصص اللي بتتكسفي منها, أرمي قمصانك الغامقة اللي فيها ريحة نفسك القديمة , واشتري نفس جديدة الونها أكثر فرحة.

التجربة سر العلاج

و الاستمرارية أم الشفاء

Image

Advertisements

فكرة واحدة على ”مقال في سب الذات النكدية

  1. حلوة جدا والله يا عم فقى
    الميزة فعلا فى هؤلاء البشر ان وقت الجد جد ووقت الهلس بيبقى هلس فعلا اوغاد 🙂

    عكسنا هنا لازم نحافظ على الوقار والبتنجان فى كل وقت حتى لو مش هتبقى سعيد بس دة ادعى لاحترام الناس ليك

    يلا بكرة تتغير
    وحلوة الصورة وحلو اليوم والرحلة يا رفيق 🙂

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s