بولي- كا- تا! – عن الأزمة الأوروبية اليونانية

هو الصراحه أنت المفروض متبقاش مهتم باللي بيحصل ده, بس من باب العلم بالشئ والتدخل في شئون الغير, بالاضافة أن الموضوع مهم فشخ وهيأثر في أوروبا (أمنا التانيه) ,وفيه عبرة أقتصادية سياسية حلوة , فأنصحك تأخد فكرة معانا

greece

بدأت أزمة اليونان في 2009 وكانت من أول البلاد الأوروبية اللي تفجرت فيها مشكلة الديون الحكومية. أغلب دول أوروبا بتتعافى من الأزمة ديه لحد دلوقتي. الا ان اليونان بهيكلها الاقتصادي المعيوب وارتفاع عجر الموازنة قبل الأزمة  وخداع المسئولين الماليين لنظرائهم الأوروبين, أستمرت المشكلة عندهم في التصاعد.

الكلام المهم بقى,

الحكومة السابقة في اليونان قعدت تراوغ وتتهرب من أخد مساعدات (bailout) صندوق النقد الدولي والبنك والموفوضية الأوروبية اللي كان بيصاحبها فرض اجرائات تقشفية تتضمن رفع الضرائب وخفض الانفاقات الحكومية. لحد فبراير 2012 اضطرت الحكومة للموافقة على الحل المنطقي الوحيد قصادها, ومع دفعة لاحقة في ديسمبر من صندوق النقد الوضع أتحسن بشكل مفاجئ بالبلاد وارتفعت معدلات النمو وانخفضت البطالة واتسمح لليونان لأول مرة منذ بداية الأزمة أن تقترض من السوق الخاص.

بولي-كا-تا

1512340_10153439038755011_5750845324525618387_n

نروح للشعب اليوناني اللطيف. لما تروح تزور بلد زي اليونان بتمر بمطحنة زي ديه المفروض تتوقع تشوف ايه؟  ناس بتشتغل 10 ساعات في اليوم وبيشتغلوا في الويكند. مولات مقفولة وناس بتشتري على القد, شباب بيحرت في الكتب وبيشتغل في الصيف. شعب في أزمة وكده ! انما تنزل البلد تلاقي ناس مبسوطة موظفين بتشتغل من 10 ل4 والناس بتغني (حلاوة شمسنا) والشواطئ مليانه بشر, والأسواق مزحومة, والشباب بيدرس مزيكا وبيلفوا أوروبا في الصيف والحياة زبادي في الخلاط.

تخيل أن في نهاية 2014 الشعب اتهرب من الحكومة بقيمة 86 مليار دولار ضرائب ! السياسين هناك بيسموا التهرب الضريبي الرياضة الجماهيرية الاولى في البلد, عم (بابادوبلس) اللي متضايق من مرتبه القليل لما بيروح بقاله يشتري حاجة ويقله متخدش فاتورة وتاخد الحاجة أرخص بيقولك قشطة (وين-وين). وعلى مستوى الشركات فالوضع ألعن بقيمة 20 مليار دولار ضرائب غير مدفوعة سنويا.

road-closed

طبعا نتيجة أنك تروح لشعب زي ده وتقلهم هنعمل تقشف ونغير خطط تحصيل الضرائب ونسرح موظفين الحكومة, مش هيعجبهم الكلام. تاني يوم ما الحكومة في 2012 وافقت مجبرة على حزمة الانقاذ, الناس نزلولهم الشارع وحرقوا مبنى البرلمان وأثينا ولعت وأحنا في مصر فرحنا وأفتكرنا عندهم ثورة زيينا وكده.

Greek Riots
Greek Riots

الخازوق Syriza

رغم أن نتائج 2014 كانت ايحابية والناس بدأت تلاقي وظائف تاني وفيه تحسن في الحالة الأقتصادية. الا أن الشعب اليوناني كان على موعد مع اختيار الخازوق. مع انصياع الحكومة السابقة لشروط صندوق النقد, بدأ التحالف الحكومي في التفكك وفي خلال سنتين خسر التحالف الحاكم 26 كرسي في البرلمان. بالطبع بأغلبية 3 مقاعد, خطة التحالف المضاد نجحت وفشل البرلمان في ديسمبر 2014 أنه ينتخب رئيس, واللي أدى وفقا للدستور أن البرلمان ينحل وتتعمل انتخابات مبكرة في يناير الماضي.

مين بقى الخازوق اللي هيطلع يستغل الموقف ده لصالحه.

grexit

تحالف يساري راديكالي, بيقوده سياسيين منهم من كان بيروج لأفكار ضد الدولة المؤسسية ومعترض من الأصل على النظام السياسي بأحزابه وحكوماته وانتخاباته وبيروج للفوضى والأناركية وضد فكرة الاتحاد الاوروبي, والحكم للشعب والكلام ده. طبعا تراجعوا عن الأفكار ديه مع الوقت اللي بدأوا يظهروا فيه في الصورة ويأخدوا هيئة شعبوية أقل تطرفا وينكروا رغبتهم في الخروج من الأتحاد.

أنت كسياسي بتاجر بشوية شعارات عفى عليها الزمن وبتنظر في الفراغ طول عمرك كمعارض, قدامك دلوقتي فرصة تاريخية. شعب كسول غير منتج, عاوز يعيش مبسوط ومرفه ومش هيقدر يستحمل تقشف 10 سنين زي الألمان وبيدور على الحل السهل. تظهر أنت ليهم في صورة المخلص اللي هيجبلهم الحل السحري وينقذهم من الرأسماليين الأشرار. وتطلع تهدد الاتحاد الاوروبي وتقولهم اليونان أم الدنيا وهتبقى قد الدنيا.وأحنا الأغريق حضارة سبحتلاف سنة, الشعب بيحب الحاجات ديه.

أنتخابات 2015, وفرحة عارمة تعم جموع يساري العالم, بفوز ساحق للتحالف اليساري الراديكالي وتشكيله الحكومة اللي هتكمل مفاوضات مع صندوق النقد والمفوضية الاوروبية.

5457

كرد فعل طبيعي, موجة كساد تضرب الاقتصاد اليوناني أخر 2014, وانهيار معدلات التحسن مرة أخرى سواء بارادة السوق الحر اللي بدأ يتشكك في مناخ الاستثمار في البلد أو بفعل فاعل أوروبي قرر يعاقب الشعب اللكعي ده على اختيارته الرخيصة. جولات من المفاوضات المتعثرة حول الدفعات المستحقة من قروض الأنقاذ أنتهت بحادثة تاريخية لأول بلد (غير نامي) يتخلف عن دفع 1.6 مليار يورو مستحقات صندوق النقد في اخر يونيو الماضي. واعلان دين الحكومة اليونانية بقيمة 32 مليار يورو.

التحاف اليساري الحاكم على مدار يونيو كان بيراوغ الاتحاد الاوروبي في قبول أو رفض شروط دفعة الانقاذ المالي الأخيرة, استكمالا للعبة السياسية اللي هو بيحضرها من أول ما وصل للسلطة. ادعاء أن شروط التقشف مجحفة وأن المفوضية بتمارس الأرهاب بعد ما علقت البنوك الأوروبية امدادتها للبنوك المحلية بأثينا اللي اضطرت تقفل البنوك وتعلق البورصة وتعطل كل عمليات ماكينات سحب الفلوس العامة. وأخيرا, اعلن أليكسيس تسيبراس رئيس الوزراء عن عمل استفتاء شعبي على شروط دفعة الأنقاذ.

92248942-merkel-tsipras

امبارح 5 يوليو, خرج الشعب اليوناني الى الشوارع ليفوض التحالف اليساري في حربه ضد …… الرأسماليين! وصوت ضد شروط دفعة الأنقاذ, خطوة ممكن يعتبرها تسيبراس نقطة قوة هيرتكز عليها في جولة مفاوضاته القادمة مع الأتحاد الأوروبي ومن ناحية تانية ناس بتشوفها اخر فرصة ضيعها الشعب اليوناني لانقاذ مصيره.

لعبة الأقتصاد على قد ما يبدو من تعقديتها الا ان حسبتها الاساسية بسيطة. بلد فيها انتاج, سياسيين بيعرفوا يجيبوا استثمار, شعب بيستهلك أقل ما بيتدخر في البنوك, وبنوك ومستثمرين بينشأوا مشروعات ناجحة يعني اقتصاد قوي. محدش عنده حل سحري للمعادلة ديه, لا يساري ولا يميني, لا رأسمالي ولا فوضوي هيخرج ضد القواعد البدائية ديه. الاتحاد الأوروبي هيعقد جلسة طارئة بكره الثلاثاء عشان يناقش نتائج الاستفتاء, وقرار طرد اليونان من منطقة اليورو مش قرار مستبعد, وأوروبا لازم تجرب تخوض تجربة خروج أحد الأعضاء منها وتخلي الباقي يتفرج على مصير اليونان ويختاروا البقاء او اللحاق بها. أما التحالف اليساري فهيلاقي نفسه مضطر يجري في حضن روسيا والصين عشان يلحقوا عجز حكومته, ويجرب بقى جنة الشيوعين المودرن وشروطهم الخيرية! وهيجيله اليوم هيطلع الشعب اللي شاله على الاكتاف لما يفلس ويقف على دماغه ويقوله  بولي-كا-تا أني جائع !

tsipras-1

ملحوظة:

ديه صورة مبسطة جدا عن الموضوع, وفيه وجه نظري الشخصية بالطبع, بس الماتريال عن الموضوع ده اونلاين موجودة بكثرة عربي وانجليزي, هو الموضوع ممتع جدا تقرأ وجهات النظر المتقابلة فيه, أنصحك تدور في المجلات والصحف الأشهر والأنضف هتنبسط !

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s